منتديات بعد احلى
نورتو حبايب منتديات بعد احلى نرجو منكم التسجيل

منتديات بعد احلى

منتديات بعد احلى كل شي معنا جديد وحصري
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 اجمل واطول القصائد في الدنيا 2012

اذهب الى الأسفل 
كاتب الموضوعرسالة
sajad.19
عضو مميز
عضو مميز
avatar

عدد المساهمات : 72
نقاط : 182
تاريخ التسجيل : 10/12/2011
العمر : 24
الموقع : منديات بعد احلى

مُساهمةموضوع: اجمل واطول القصائد في الدنيا 2012   الإثنين أبريل 02, 2012 2:31 pm

((( قـصائـد )))

اجيتيني بوكت بي انه حزنان
اجيتيني ومليتي ايامي افراح
الج عمري وحياتي ونبض كلبي
بس يمج انام واغفه وارتاح
جناحي انتي من اطيرن بالسمه فوك
شلون اكدر اطير وما الي جناح
حبيبة كلبي انتي ونور عيني
كل عمري انتي كله الجاي والراح
انتي البيت انتي العتبه والباب
ضوه انتي بغرفتي وأحله مصباح
من اطب للبيت انسه همومي كلها
انتي بداخلي بنص روحي سباح
كلشي انتي بحياتي وانه بلياج
حايط وانهدم من كل كتر طاح

انشع من اشوفنك علي جاي
واسكر حيل اذا اشبكك اطوطح
وجيني العيد مأتم لون ما جيت
وبيوم الطبك لو جيت افرح
واكول اربحت وانه وياك خسران
واكول خسرت لو وي غيرك اربح
مرجوحه الكلب ومحبتك عيد
وبما انك طفل حقك تمرجح
حلو وتلمع وتكتل انت اذن سيف
اذن عذرك وياك وانت تجرح
وما افكر واخاف انت تذبحني افكر خاف اتعبك وانت تذبح
اعرفنك غلط بس مستعد بيك
وكمت الخاطرك حته اكره الصح

تسوه الدنيا عندي من اكعد وياك
وبدونك كلشي ماتسوه دنيتي
من اطب لبيتكم اشبك على الباب
ويشبكك بابنه من تطب بيتي
فرق ما بين عمري وعمرك هواي
وكمت الخاطرك اصبغ لحيتي
اتأذه اذا وي غيرك ارتاح
وحيل ارتاح اذا منك اذيتي
وغيرك من يردلي العمر ما اريد
واريد وياك لو يمك منيتي
وعليك العين تبجي ليل وانهار
واكلها شعطلج شو ما بجيتي
قضيتي وياك ابد خلتني ما اشوف
وادعي من الله لا تنحل قضيتي
يوصي اهله بجهاله الرايد يموت وبس اسمك لكو اهلي بوصيتي

على غيرك مارحت مابيه عالنوح
وعليك شكد حلو يونسني نوحي
كضيت زيارتي بس اندعيلك ونسيت وداعتك اندعي لروحي
جنت من روحي ضايج كبل ملكاك
وكل ساعه اكل الروحي روحي
هسه لا بعد من روحي ما أضوج
اضوج شلون وانت صرت روحي
انشع حيل من تلجمني الجروح
واضل مقهور لو طابت جروحي
اعتبرت الي يداووني يلجمون
ولتجم بيه واعتبرك علاجي
وسجين بحبك انه متاني الفراج
واصلي واندعي لا يجي فراجي
محتاج لحنانك حيل محتاج
ومحد غيرك يسدلي احتياجي
واذا عطشان يلكه نهر مثلك
ما معقوله يفتر عالسواجي
تحرجني بقصد وتطلع الروح
واكل للروح ما يقصد احراجي
ابو الطبع المزاجي شكد اكرهه
واموت عليك جي طبعك مزاجي


الواحد فرد ما يقبل التقسيم
بس انه انقسم وبدونك اتعدد

اتقسم بدونك وانجمع وياك
لأن كلي ويه كلك بيك نتوحد

جنت جاهل واجيك اتشرد من الناس
هسه تعلمت من نفسي اتشرد

عشكتك ذره ذره وصرت اغار عليك
اذا محد يبوسك اذبح المحد

ولك لا تنطرح يم ناس تعبانين
مو طولك حصار شلون تتمدد

وشعرك ليله ضلمه توحشت عالريح
كل ما هب عليها تلفلفه بأسود

وجبينك ايد موسى المعجزه البيضاء
موحقه الكفر من شافك تعبد

وفراشه نور اذنك والزلف خطاف
مره يحط عليها ومره يتبعد

وجفنينك سمه ومجفي على رمشك ليل
اذا ترمش يضل فرقد يطك فرقد

يل عينك بحيره بكل هدوء الليل
ودموعك نوارس لو مشت عالخد

وعلى خدودك صور منقوشه من بوسات
اباوع بالصور ما بايسك احد

وشفتينك شمس من تبتسم نصين
يكطعها البرق وبنصها يتجمد

وحنجك صدر بجعه انصاغة من النور
اذا ماتت شمس من نوره تتولد

ومثل زمزم ركبتك نص ذهب نص جام
وعين الماي هاي العالصدر تركد

وانام اباب صدرك واذنب وانخاك
كبتين الذهب ما تشفع الاحد

يبو ايد الثلج لا تعلع بتموز
مو خاف الثلج خاف الخلك تبرد

واذا لا مو ثلج كل هالبياض منين
معقوله العضم فوك الجلد يصعد

يل جتفك مناره بيا شرع يا دين
اموت من العطش وكبالك اتشهد

وحدر جتفك فرات ودجله ملتقيات
وشفت شط العرب جوه الجتف ممتد

واباوع عالبطن مو ركبة الدلفين
لأن عين الحياة بطرفتك تركد

يبو ساك الكطن ليش فتحتلك باب
مو خاف الكطن بالعين يتفرهد

خطواتك حضاره وخصرك التاريخ
اذا تمشي العرب فوك الفرس تصعد

وعلي كل ما تمر يجبرني حسن البيك
اوصفنك لجن من وصفك اتردد

لذلك ما وصفتك واعتذر يهواي
وصفت الخيال المنك تولد


شكالولك عليه وصار وجهك سيف

وتعرفني التكتلك والحجي
مصدكه

شجره ومو بديه وتدري وكتك ريح

تحملني ذنب من طيحت وركه

خلك ساتر ولك سويت خلكي وياك

شكد موت وجثث ماظيكت خلكه

مو من صالحك علجرف تزرع عود

ماتدري عله ساعه يفيض ويغركه

ومن شفت الخناجر خذت دور السيف

كلت ياروحي صيري بهلوكت فركه

وتسألني تكلي أسوه وكتك بيك

شسولفلك شكلك تكتل الحركه

ذبني أبير بيده وكال أكلني الذيب

ورسم لذيب صوره وجثتي بحلكه

طفاني وعلجمر بجفوفه رش الماي

ورد ينفخ رماد ويا جمر يلكه

مايدري الوكت لو عجز عدت خيل

ليطيح بدربها جدامها تسحكه

ذبحني أمناطرك غيمه ومطرها أيطيح

كظت شوغات روحي بلهفت الملكه

صرت مثل المشابك من تجيه أبطيف

أشبكنك وفز وكلشي ما ألكه

مو ذنبي تره البعض البشر مالوك

لئن طبعي صريح وراسي ما دنكه

لؤلؤ بلضم كلش جميل يصير

بس هو الحجي عركبه تعلكه


وين تريد أغرد كل خضارك مات.
ذبل كلشي بحياتي ويبس بستاني.
صحرى بعيني صارت ياغنه البطران.
البجي واجب علي من ماتن أغصاني.
تحط روحي بقفص وتكلي غن ياليل.
ولك ياليل أغني الليل
بجاني.
أنه مانمت ليلي وخلصيته
دموع.
وأنته أوسادتك من ريش جنحاني.
وتصور تحبني وأني راضي وياك.
تفك باب القفص تعتدقد تلكاني.
أطير وبني عش وي الشجر والريح.
وغرد من صدك مايجذب ألساني

خجل حتى الوطن من شافنه بهل حال _ مثل والد عليل تعاركو ولده

ياجار اليحشمه او يدري بالجيران _
متحزمه عليه وتشتغل ضده

اذا مايهده تهده وتفرح ونرتاح
وماتهده دقيقه من الوضع يهده

باوع عالدول والناس وصلت وين
وحنه بهل خلاف نجيب ونرده

مسرحنه نعرف واشتهر والابطال
مخطوف وشهيد ولازمه العده

ومجهول الهويه وجسد مابي راس
وفجوعه بولدهه وتصرخ بسده

مسكين اليتيم يمر عليه العيد
وادموعه فواتح ناصبه بخده

كلي بيا ذنب كتلو ابوه وليش
كوم عيال عده وكلشي ماعده

وكلي بيا بخت جابو بغير زنود
للجابت عمرها مجلبه بزنده

جرحك مثل جرحي وبلوتك بلواي
وصوابك صوابي شلون ماشده

ناوشني المحبه وبوسه للتجبير
خل نكطع نزفنه ابلسم الوحده

اشكد مشتاك امر الاعضميه اليوم
و النعمان ازوره ويمك اتغده

ونعبر علجسر نتمشه ايد بأيد
يم باب الحوائج غيضنه انهده

لاخير بوطن ماتغفه عينك بيه
ولاخير بشعب مايعبر الشده



أحجي وياك وحدي ونته ما موجود

وسولفلك عليه وانته مو يمي

واصيح واشتكيلك وصرخ من الاه

ولا جني أشتكيلك وحرك بدمي

تلم بيه حطب لتكلي ألمن بيك

لئن جاسك برد مو كاتلك لمي

ولا كلبك عليه وتحزن من ارتاح

وتغمني من الكلب من أغرك بهمي

فصمه انا وتطمني وبس أظوك الماي

اصعد علتراب الكيف بطمي

وخضر ياخضار وعله فوك الكاع

وينذم اليذمني ويزغر بذمي

بس هيه المصيبه اشوكت أكض الماي

وفك حلك القفص وطير ال جلمي


عشـــنه من الزغـــرفقـــره ومساكين
وعرفنـــه العوزلحـــظه ما وعينـــه
فتحنه عله المصايب شوف العيون
وعلى حجاية گـضت هانت ربينـــه
لگـينه گـماطنـــه همـــوم وعذابات
وبعد ماتـــدري لوتدري شلگـينه
لگـينـــه دموعنـــه تهـــز الكواريك
وسمعنـــه جروحنه يلولن
علينه
عمرجعنه وعطشنه وضگـنه الأحاه
وعمر ضكنه الوكت بس ماشكينه
حلـــم بالعـــيد نلــــــعب عالمراجيح
وخنگـنه الحلم ســـر ومـــا حجينه
لأن فقـــره أهلـــنه ولـــو حجيناه
عذرهـــم تنگـطـــع وتطيـــح بينه
عرينـــه مـــن الجديد بجية العيد
وأبـــد مـــن الخـــجل لاما عرينه
ردنـــه أنمد أدينه بساعـــه الجوع
لگـينـــه جـــفوفنه تگـطـع بدينه
رضينه بفي أهلنه نمـــوت مرات
ونعيش بفي غرب لامـــا رضينه


صعبه ترد كزاز وصافي مثل الماي

كزاز بطيحتك شتعدل الصوره

الزك بيك كوه من الصبح لليل

وحس من الخدش عشرتنه مبتوره

ماترهم أكلك لوله ظلت بيك

أعدل صورتك ولكاهه مكسوره

جنت أصورك بس أنت فوك الكاع

كلشي يصير أنت بكلشي ألك صوره

يوم الماتمر صحراء أصير أعليك

وعليك من العطش كل ذره مفطوره

ظلي الجان ظلك هسه ظلي أنباك

وذكر كبل من جنت أنت ناطوره

شجره تكول بعدك ياهو لمسميك

خضارك مو شرط والناس معذوره

ماتسمى شجره المايمره الطير

ومن سرب البلابل بقت مهجوره

مو شرط من أظوكك حته أميز البيك

بلسان السوالف تلكه لمروره

ما تصعب علي من كلش أمن بيك

حليتك كبل من جنت حزوره

عشرتي وياك كاتبه النقش محفور

ما كاتبه مثلك فوك صبوره

وبين هسه حبك من أجت الريح

كبل طبشور أديك أنمسح طبشوره

أنا أدري مشيتك هسه بيه أغرار

وكولن مشتبه ياحاير أصطوره

كبل كلش غشيم وكلبي أمن بيك

حاجزهه المشاعر الك منذوره

هسه أنت البعد والعشك كفر أعليك

وصلبه أعله الشجر لو فكر أيزوره

أمس كتلك يماي الورد راح أيموت

حديقه حبنه يم الموت مخطوره

فقط لزينه لو ما أوزع الماي

وبشكل الحدايق كلهه مسحوره

هسه أتندمت من نشف مايك جاي

من ظل عتراب العشك ناعوره

لاتزكي الحدايق كون عندك ماي

ترجع ما أريدك أبقى نافوره

جاي تريد ترجع من جديد وياي

كل عقلك تسولف لو حجي أسطوره

أيس حبنه مات أشلون أزكي المات

وترى وباب الكلب صبيت كافوره


اذا كلبك عليه اتشطر ارباع
انا كلبي تفتت وذره وذره

واذا كلبك عليه بنص بحر ضاع
ترى شخصك نسيته وفات ذكره

ماترهم علينه نبقى اخوان
وكلبي انت الكتلته وصار صخره

بعد ما أخاوي انه وابقه محتار
وياهو اليجي احترمه واقدره

لأن خلي لأحبه خان وياي
ونسه خوتي ومحبتي ونسه العشره


بعهد صدام جام البيت مكسور ومن البرد ليلك ماتنامه

هسه البيت زين وصار بي جام
بس كلب العراق انكسر جامه

الحمد لله كلت من راح صدام
الحمد لله كلت بس عالسلامه

اشو ياهو التكضه صار صدام
واكو صدام بس لابس عمامه

الكراسي هيه كعدت عالكراسي
لأن ماكو زعيم ولا زعامه

ذله بذله نكضي الليل منام
والصبح بالمدرسه ندرس كرامه

اوا لدنه الوطن بابه نسميه
اشو بابه عدل واحنه يتامه

عجيب شكد ايمه يا وطن بيك
او وجهك للرحم مابي علامه

عجيب وبيك ابو فاضل العباس
وعندك جف ولا عندك شهامه

ممنوع التجول يا وطن بيك
لأن حتى الدرب ساحب اقسامه

وشمل منع التجول حتى العضام
والدم ما كدر يمشي بعضامه

حمام الناس وانت يا وطن حوم
ومنك ما اضن تسلم حمامه

انت بروفسور بقبض الارواح
وعزرايين الك دنك الهامه

يوميه قيامه يا وطن بيك
اذن كلش سهل يوم القيامه


احبك مو لأن انته حلو لا
لأن روحي التقت كبلي ولك بيك
اذا انت اتمر على اعمه يصيح الله
والاخرس لون حاجيته يحاجيك
اذب كلبي على سهمك وانا مجروح
واكلك دير بالك خاف اأذيك
اجرحني ولك بس كون عالكيف
لأن انت ويه دمي وخاف ابديك
واجرحني ولك بس كون ما اموت
حتى من يتهمونك ابريك
عالمرايه وكفت ماشفت وجهي
شفت وجهك طلعلي وكمت احاجيك
وثبت بمرايتي وجهك مرايات
وتباوع وجهها مرايتي بيك
بكذلتك شد ركبتي وطلع الروح
اريدنها بعد تتقرب عليك
انت بحضني بس اعتبرك بعيد
اريدن هيج كون انه انخبط بيك
بيا شارع مشيت اكبالي الكاك
ادور بغير شارع هم الاكيك
ارد للبيت كبلي الكاك بالباب
اطب كبلي تطب وتكلي اتانيك
وتالي اليل اكلهم باجر انساك
افز من غبشه الله واحجي بس بيك
بغيرك فكرت كلت حتى انساك
طلع غيرك يشبهك فكرت بيك

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اجمل واطول القصائد في الدنيا 2012
الرجوع الى أعلى الصفحة 
صفحة 1 من اصل 1
 مواضيع مماثلة
-
» نهايه العالم 2012 نبؤه ام حقيقه علميه
» قرعة تصفيات كاس امم افريقيا.2012
» وداعاً للأرض هل نقولها عام 2012
» اخبار ::: تصفيات يورو 2012
» تصفيات كأس افريقيا 2012 الجولة الأولى الجزائر 1- تنزانيا 1: الخضر يخيبون أنصارهم أداء ونتيجة والجماهير تصرخ إرحل ياسعدان

صلاحيات هذا المنتدى:لاتستطيع الرد على المواضيع في هذا المنتدى
منتديات بعد احلى :: منتدى الشعر العام-
انتقل الى: