الروح لمن تحب تنسه الحزن والدمع
بس روحي لمن هوت زاعلها كل الفرح
واشلعت الضحه شلع
مو بيدي من انجرح
مغصوب هذا الكلب يغفه اعله صوت الحزن والفرح ما ينسمع
او مو بيدي لمن صرت شاعر واحس بالالم
هوه اجاني الشعر والله يمي ركع
او مو ايدي تكتب شعر او مو روحي تكتب شعر
او مو فكري يكتب شعر الكلب يكتب طلع
ما شفت من دنيتي ضحكة بطرف شفتي
بس شفته هذا الكلب عالحزن لمن وكع
ما بيه حيل الصبر وما عندي غير الصبر
وحبل الحزن شدني وبالبجي ما ينكطع
ياهو الاعرفه دوة واشكيله ضيم الزمن
انه الاعرفه وفي اطلعت بي منخدع
ذبلني هذا الحزن وشبيت عكس البشر
الروج يكبر اذا عن البحر يرتفع
وحسبت اعيش العمر ضحكة ومحبه وفرح
ما ضوكه طعم الجرح عنه اصبحت ممتنع
وشحسبت كله غلط فتحت عيني بزغر
شفت الجرح بالجرح بالجرح اجروح يرضع رضع
وندمان أخر ندم شيجيب كلي الندم
بس حسرة مثل الجمر ما تنطفي بالدمع
والراح ما اضن يجي ضيعته مني الامل
مثل اليموت وخلص وما شفنه ميت رجع
كالولي سلبه الفرح اوكفله نص الدرب
غمض اعيونه يجي بعدين شوف الوضع
وانتظر هسه يجي تانيته هسه يجي
هسه يجي الماي يرويلي كل الزرع
وانوب اجاني الحزن كلي كتلته الفرح
او مو انته بس مبتلي مبتليه كل الربع
للشاعر احمد الفريجي